Gobernu, banku eta ugazaben helburua aberastasun beren eskuetan metatzea, sektore publikoa desegitea, oinarrizko zerbitzuak etengabe pribatizatzea eta eskubide sozialen esparrua murriztea besterik ez dela ikusi ahal izan dugu.

Gainera, izugarria iruditzen zaigu aipatu egoeraren aurrean, Gobernua, ikuspuntu ekonomiko eta sozialetik inongo errentagarritasunik ez duten AHT bezalako azpiegitura proiektu haundietan milaka milioi euro xahutzen aritzea, jarduera ekonomikoko beste sektore batzuk eta etxebizitza, hezkuntza edo osasunaren beharrak ase gabe geratzen diren bitartean.

Egunez egun, AHTra bideratzen den aurrekontu publikoak, herritarron bizitzarako funtsezko diren Osasuna, Hezkuntza edo Laguntza Zerbitzuen kalitatea murrizten du, gizarte-egoera ahulenean dauden sektoreen prekarizazioa areagotuz eta herritarron gehiengoaren bizi-baldintzak gero eta gogorragoak bihurtuz.

Azpiegitura erraldoi horiek enplegua sortuko dutenaren kontua gezur hutsa da : zergatik da espainiar Estatua langabezia-tasa altuena duena autobide eta Abiadura Handiko Trenen kilometro gehien dituena izanda ?

Izan ere, AHTa eraikitzeko gutako pertsona bakoitzak 4.790 euro baino gehiago ordaintzea dagokigun bitartean, gastu soziala murriztu, kaleratze librea prestatu eta gero eta eragin ekologiko latzagoak eragiten ari dira.